නොවැම්බර් මාසය කිතුනු අපට සුවිශේෂී වූ මාසයකි. අප අතරින් වෙන්ව ගිය අපගේ ආදරණීයයන් සිහිපත් කරමින්, ඔවුන්ගේ ආත්මයන් වෙනුවෙන් යාච්ඤා කිරීමටත්, ඔවුන් අප වෙනුවෙන් කළ කැපකිරීම් සහ අපගේ ජීවිත තුළ තැබූ මතකයන් ආදරයෙන් සිහිපත් කිරීමටත් මෙම මාසය අපට විශේෂ අවස්ථාවක් සලසා දෙයි. මෙම උතුම් අරමුණ පෙරදැරි කරගනිමින්, හෝමාගම ශුද්ධ වූ මිකායෙල් අග්‍රදූතයාණන්ගේ දේවස්ථානය විසින් අප අතරින් වෙන්වූ ආදරණීයයන් සිහිපත් කිරීමේ විශේෂ වැඩසටහනක් සංවිධානය කර ඇත. ඒ සමඟම අපගේ දේවස්ථානයේ ප්‍රතිසංස්කරණ කටයුතු සඳහා ඔබගේ සහයෝගය ලබාගැනීම ද මෙම වැඩසටහනේ තවත් අරමුණකි. ඒ අනුව, නොවැම්බර් මස 28 වන දින සවස 5.00ට දික්හැතැම්ම ලූර්දු මෑණියන්ගේ දේවස්ථානයේදී විශේෂ දිව්‍ය පූජාවක් පැවැත්වීමට නියමිතය. එහිදී ඔබ විසින් ලබාදෙන මියගිය ආදරණීයයන්ගේ නම් ගරු පියතුමා විසින් දිව්‍ය පූජාව අතරතුර කියවා සිහිපත් කරමින්, ඔවුන්ගේ ආත්මයන් වෙනුවෙන් විශේෂ යාච්ඤා ඔප්පු කරනු ලැබේ. ශ්‍රී ලංකාවේ මෙන්ම විදේශයන්හි සිටින සියලුම පවුල්වල සාමාජිකයන්ට සහ හිතවතුන්ට මෙම උතුම් මෙහෙවර සමඟ එක්වන ලෙස අපි බැතිබරව ආරාධනා කරමු. ඔබගේ මියගිය ආදරණීයයන්ගේ නම් අප වෙත ලබාදෙන අතරම, හෝමාගම ශුද්ධ වූ මිකායෙල් අග්‍රදූතයාණන්ගේ දේවස්ථානයේ ප්‍රතිසංස්කරණ අරමුදල සඳහා ඔබට හැකි අයුරින් පරිත්‍යාගයක් ද සිදු කළ හැකිය. ඔබ විසින් සිදුකරනු ලබන සෑම පරිත්‍යාගයක්ම අපගේ දේවස්ථානයේ ප්‍රතිසංස්කරණ කටයුතු ඉදිරියට ගෙන යාමට මහඟු ශක්තියක් වනු ඇත. එමෙන්ම, ඔබගේ ආදරණීයයන් සිහිපත් කරමින් සිදුකරන මෙම කැපකිරීම ආදරය, විශ්වාසය සහ කෘතඥතාවය ප්‍රකාශ කරන අර්ථවත් පරිත්‍යාගයක් ද වනු ඇත. පරිත්‍යාගයේ වටිනාකම එහි ප්‍රමාණයෙන් නොව, එය සිදුකරන හදවතේ භක්තිය සහ පරිත්‍යාගශීලීත්වය තුළින් මැනේ. එබැවින් ඔබගේ හැකියාව අනුව මෙම උතුම් මෙහෙවරට දායක වන ලෙස කාරුණිකව ආරාධනා කරමු. අප අතරින් වෙන්වූ සියලුම විශ්වාසවන්තයන්ගේ ආත්මයන්ට දෙවිඳුන්ගේ කරුණාවෙන් සදාතනික විවේකය ලැබේවා! ආමෙන්.
21 දින ඉතිරියි
